કવિતા - Gujarati Poems

શ્રી યોગેશ્વરજી રચિત

॥ કાવ્યપુષ્પો ॥

ગીતો, કવિતાઓ, બાળગીતો તથા માતૃઅંજલિ કાવ્યો

અમર આશા - ૨

< BACK
ગાંધી ગૌરવ
NEXT >

આવે નહીં રવિ સમસ્ત વસુંધરાના
બેસે પ્રમાદભર ત્યાં લગ લોક સર્વે ?
ઘેરા અશાંતિથરને નવ ભેદવા ને
સ્વલ્પે પ્રકાશ ધરવો જગમાં અનેરો ?

ક્લેશો કુસંપ વડવાનલ વેદનાના
પીડી રહ્યા મનુજને નવ ઠારવાને
સ્નેહાર્દ્ર સિંચન કરી રસનું રહેવું,
ના માધુરી ગરલમાં ભરવા જરાયે ?

એ જ્યોતિના પતિ ભલે પ્રકટે છતાંયે
અંધારના પડળ ત્યાં લગ ટાળવાને
સ્વલ્પે પ્રયત્ન કરવા નિજ દીપિકાથી;
ના યોગ્યતા અનિલ જોમભર્યા થવાની.

કિન્તુ પવિત્ર બનતાં લહરી હવાની
પૃથ્વી પ્રસન્ન કરવી મધુતા વહાવી.

-------

( શ્રી યોગેશ્વરજી કૃત 'ગાંધી ગૌરવ' માંથી )