કવિતા - Gujarati Poems

શ્રી યોગેશ્વરજી રચિત

॥ કાવ્યપુષ્પો ॥

ગીતો, કવિતાઓ, બાળગીતો તથા માતૃઅંજલિ કાવ્યો

સુખ

< BACK
ગાંધી ગૌરવ
NEXT >

જે સુખ થાય માતૃગુણ ગાયે.
માતૃભૂમિસેવા કરતાં ને મર્યે માતૃભૂમિછાંયે
એ સુખની તુલના ન કરાયે, વર્ણન પૂર્ણ ન થાયે,
જે સુખ થાય માતૃગુણ ગાયે.

તપવ્રત તીરથ નીરસ લાગે એની આગળ સાચે,
યજ્ઞયાગ સ્વાધ્યાય નિયમમાં રસજ્ઞ કોણ જ રાચે ?
આસન પ્રાણાયામ ધારણા ગૌણ બની સૌ જાયે.
જે સુખ થાય માતૃગુણ ગાયે.

લૌકિક સુખવૈભવ આકાંક્ષા એનાથી ન વધારે,
સ્વર્ગ લાભ સિદ્ધિ કૈવલ્ય ન એથી મધુર લગારે;
જન્મોજન્મ સાંપડ્યે સુખ એ સાર્થકતા ના માયે.
જે સુખ થાયે માતૃગુણ ગાયે.

-------

( શ્રી યોગેશ્વરજી કૃત 'ગાંધી ગૌરવ' માંથી )