Gujarati Bhajan : વ્હાલા આપે તો એટલું

મા સર્વેશ્વરી રચિત

॥ ગુજરાતી ભજનો ॥

અંતરને ઝંકૃત કરનાર ભજનો, પ્રાર્થના, સ્તુતિ, આરતિ અને સ્તોત્ર

વ્હાલા આપે તો એટલું

< BACK
અંજલિ
NEXT >



વ્હાલા આપે તો એટલું આપજે રે,
શરણાગત વત્સલ ભગવાન....

રાગ દ્વેષ મમતા હૈયે ના વસે રે,
પ્રેમે નસનસ નિર્મળ થાય....વ્હાલા...

દુનિયાના કામમાં તુજને ભૂલું નહીં રે,
નિરંતર નામ જપાવજે, નાથ....વ્હાલા...

મનડું મિથ્યાભિમાનમાં ના રમે રે,
નમ્રતા આપજે, મારા રાજ...વ્હાલા...

નાવિક ભવસાગરનો બની જજે રે,
હોડલી હંકારજે પેલે પાર...વ્હાલા...

રોમરોમ રંગજે તારા રાગથી રે,
કરજે જગમાં જયજયકાર...વ્હાલા...

રચના સમયના મનોભાવો

સાચો ભક્ત ભગવાન પાસે પ્રભુપંથે જરૂરી વસ્તુઓ જ માગે છે. એવી જ માંગણી આ પદમાં થઈ છે. જીવનમાંથી રાગદ્વેષ દૂર થાય ને પ્રભુનો પવિત્ર પ્રેમ પ્રગટે. વળી, રોજબરોજના જીવનમાં પ્રભુનું નિરંતર નામ જપી શકું એવી માનસિક ભૂમિકા પણ પ્રભુ આપે એવી ભાવના વ્યક્ત થઈ છે.

થોડીક સાધના થાય ને વળી મનમાં મિથ્યાભિમાન આવી જાય તો, પ્રભુ! તું જ મનને નમ્ર બનાવજે.

જીવનનો આધાર તો તું જ છે. તો હવે મને ભવસાગરની પાર ઉતારજે.

રોમરોમમાં કોઈ દુન્યવી રાગને બદલે પ્રભુનો પવિત્ર અનુરાગ અંગેઅંગમાં છવાઈ જાય એવી કૃપા, હે પ્રભુ ! મારી માંગણીનો પ્રત્યુત્તરરૂપે પૂરી પાડજે.


    (મા સર્વેશ્વરી કૃત 'અંજલિ' માંથી)