Gujarati Bhajans - Devotional songs

શ્રી યોગેશ્વરજી રચિત

॥ ગુજરાતી ભજનો ॥

અંતરને ઝંકૃત કરનાર ભજનો, પ્રાર્થના, સ્તુતિ, આરતિ અને સ્તોત્ર

ક્યારે બતાવશો રૂપ

< BACK
આલાપ
NEXT >

ક્યારે બતાવશો રૂપ, રૂપ હવે ક્યારે બતાવશો ?
સંસારે સૌથી અનુપ, રૂપ હવે ક્યારે બતાવશો ?...ક્યારે.

જન્મીને પ્રીત મારા અંતરમાં જાગી,
દિવ્ય રૂપ જોવાને લગની છે લાગે,
જીવન થયું છે અનુરાગી, રૂપ હવે ક્યારે બતાવશો ?...ક્યારે.

અંતરમાં આજ એક ઊઠી છે વેદના,
આંખને ભરીને જોવાની સંવેદના
કરશો નહીં અવહેલના, રૂપ હવે ક્યારે બતાવશો ?...ક્યારે.

જોયા વિના રૂપ શાંતિ વળે ના,
વાતો ક્યારે વિના રસ કૈં મળે ના,
લેશે મારી ચિંતા ટળે ના, રૂપ હવે ક્યારે બતાવશો ?...ક્યારે.

આજ એક ઝંખના જીવનની મારી,
બીજી કોઇ મારી ઇચ્છા ના ભારી,
આવીને લો મને ઉગારી, રૂપ હવે ક્યારે બતાવશો ?...ક્યારે.

લાખો શશી સૂર્ય જેવા પ્રકાશથી,
પ્રકટી મારી સામે ફૂલ સમા હાસથી,
બાંધી લો પ્રેમના પાશથી, રૂપ હવે ક્યારે બતાવશો ?...ક્યારે.

રૂપ જોઇ 'પાગલ' હું પ્રેમે નાચી રહું,
ધન્યતાનો આનંદ કેમેય ના કહું,
પ્રેમીના સુખને સદા લહું, રૂપ હવે ક્યારે બતાવશો ?...ક્યારે

( શ્રી યોગેશ્વરજીના ભજનસંગ્રહ 'આલાપ' માંથી )