Gujarati Bhajans - Devotional songs

શ્રી યોગેશ્વરજી રચિત

॥ ગુજરાતી ભજનો ॥

અંતરને ઝંકૃત કરનાર ભજનો, પ્રાર્થના, સ્તુતિ, આરતિ અને સ્તોત્ર

અશરણશરણ તમે છો

< BACK
આલાપ
NEXT >

અશરણશરણ તમે છો સાચે, આવ્યો છું શરણે
તમારે આવ્યો છું શરણે !
અનુપમ સુખધારાનું દર્શન, થાય મને ચરણે,
તમારા થાય મને ચરણે !...અશરણશરણ

અનાથ છે અંતર આ મારું, જીવન છેક થયું અંધારું,
કરો તમે આજે અજવાળું, આવ્યો છું શરણે
તમારે આવ્યો છું શરણે ! ...અશરણશરણ

તમારા વિના રસ ના લાગે, વીણા મારી લેશ ન વાગે,
ભરો તમે અંતર અનુરાગે, આવ્યો છું શરણે
તમારે આવ્યો છું શરણે !...અશરણશરણ

મૂર્તિ તમારી મંગલ ન્યારી, અંતરપટમાં છે મેં ધારી,
થઇ હવે તો પૂરણપ્યારી, આવ્યો છું શરણે
તમારે આવ્યો છું શરણે !...અશરણશરણ

શરણ તમારું સુખમય આપો, કરને મારા શિર પર સ્યાપો,
કલેશકષ્ટ કાયમનાં કાપો, આવ્યો છું શરણે.
તમારે આવ્યો છું શરણે !...અશરણશરણ

‘પાગલ’ પ્રાણ પ્રેમમાં મારો, ઝંખે તમને તેને તારો,
દર્શન આપી આજ ઉગારો, આવ્યો છું શરણે
તમારે આવ્યો છું શરણે !...અશરણશરણ

( શ્રી યોગેશ્વરજીના ભજનસંગ્રહ 'આલાપ' માંથી )