ભગવાન કૃષ્ણની સ્તુતિ

શ્રી યોગેશ્વરજી રચિત

॥ ગુજરાતી ભજનો ॥

અંતરને ઝંકૃત કરનાર ભજનો, પ્રાર્થના, સ્તુતિ, આરતિ અને સ્તોત્ર

ભગવાન કૃષ્ણની સ્તુતિ

< BACK
ભગવાન કૃષ્ણ
NEXT >

વંદન નંદ-યશોદા નંદન (૨)

માત દેવકીનાં પ્રિયનંદન,
કરો અસુરદળ કેરું ખંડન,
પ્રણિપાત પરમ યદુકુલચંદન ... વંદન નંદ-યશોદા નંદન

મન મથુરાના મંગલવાસે,
મૂર્તિ મધુરી નિશદિન હાસે,
અંતર કરતું પ્રેમે ક્રંદન ... વંદન નંદ-યશોદા નંદન

ભાવ ભક્તિની નિર્મળ યમુના,
વહે નિરંતર રમણ કરો ત્યાં,
અરજી એ અઘ અખિલનિકંદન ... વંદન નંદ-યશોદા નંદન

વેણુ વગાડો રાસ રમાડો,
તરસ તમારી તીવ્ર લગાડો,
અર્પીએ આત્મિક અભિનંદન ... વંદન નંદ-યશોદા નંદન

પ્યાસ તમારી આશ તમારી,
ઉર ઉપવનમાં રસની ક્યારી,
સફળ કરો હે મુનિમન મંડન ... વંદન નંદ-યશોદા નંદન

અંતરમાં શુચિ ભાવ ભરી લો,
દર્શન દેતાં ધન્ય કરી દો,
સાર્થક સર્વ કરી દો સ્પંદન ... વંદન નંદ-યશોદા નંદન

( રચયિતા - શ્રી યોગેશ્વરજી )