Sai Sangeet - Bhajans on Sai Baba

શ્રી યોગેશ્વરજી રચિત

॥ ગુજરાતી ભજનો ॥

અંતરને ઝંકૃત કરનાર ભજનો, પ્રાર્થના, સ્તુતિ, આરતિ અને સ્તોત્ર

શ્રધ્ધા ઘણી રાખી રહ્યો છું હું

< BACK
સાંઇ સંગીત
NEXT >

શ્રધ્ધા ઘણી રાખી રહ્યો છું હું,
હવે તમે વાર કરો છો શું? ... શ્રધ્ધા ઘણી

સર્વસમર્થ તમોને માની
ધ્યાન ધરી રહ્યો હું;
જે ધારો તે સર્વ કરી શકો,
આશા મરી ના હજુ ... શ્રધ્ધા ઘણી

નાવડું ડગમગ ડોલે છે મારું,
ગરજે છે આભ ઘણું;
ઉઠે ઉત્તુંગ તરંગ ચોપાસ,
તોયે ના દુઃખ ગણું ... શ્રધ્ધા ઘણી

લાંબો પ્રવાસ ને સાથ ના કોઈ,
હિંમતે આગે બઢું;
રાતના પડછાયા પડતાં છતાંયે
શોકથી ના જ રડું ... શ્રધ્ધા ઘણી

આધાર એક તમારો છે મારે,
આવોને વ્હારે હજુ;
'પાગલ' પ્રેમને નાતે કરી છે
અરજી મેં આજ રજુ ... શ્રધ્ધા ઘણી

( શ્રી યોગેશ્વરજીના ભજનસંગ્રહ 'સાંઇ સંગીત' માંથી )