Sai Sangeet - Bhajans on Sai Baba

શ્રી યોગેશ્વરજી રચિત

॥ ગુજરાતી ભજનો ॥

અંતરને ઝંકૃત કરનાર ભજનો, પ્રાર્થના, સ્તુતિ, આરતિ અને સ્તોત્ર

યાદ તમારા વિના

< BACK
સાંઇ સંગીત
NEXT >

યાદ તમારા વિના કરું શું?
શું યાદ તમારા વિના કરું હું?

ઊઠી પ્રભાતે પ્રથમ તમારા
ચરણોમાં પ્રણિપાત કરું છું;
શ્રધ્ધાના બે શબ્દ સુણાવી
પ્રેમતણાં બે પુષ્પ ધરું છું ... યાદ તમારા વિના કરું શું?

તમે જ મારાં સ્વજન હિતેચ્છુ,
માતપિતા ને ગુરૂ ગણું છું;
પાલક તારક ને ઉધ્ધારક,
ક્લેશ તમારાથકી હણું છું ... યાદ તમારા વિના કરું શું?

તમારાસમું કો' સંસારે,
તમને સ્વામી શ્રેષ્ઠ ગણું છું;
તન મન એક તમારા ભાવે
સત્ય કહું દિનરાત વણું છું ... યાદ તમારા વિના કરું શું?

'પાગલ'ના પ્રભુ કૃપાળુ છો તો
સ્તવન કરીને શાંતિ લહું છું;
જો જો ભૂલ ન થાય જરીયે
વંચિત કૃપાથકી ના રહું હું ... યાદ તમારા વિના કરું શું?

( શ્રી યોગેશ્વરજીના ભજનસંગ્રહ 'સાંઇ સંગીત' માંથી )