અક્ષત

સંસ્કૃતિના સર્વોચ્ચ સુમેરુ શિખર પર

સૈકાઓ પહેલાં આસીન થયેલા મારા દેશ !

તારી જ્વલંત જ્યોતિથી દિશા પ્રદિશા પ્રજ્વલિત બની’તી :

પૃથ્વી પરિમલપ્રસન્ન પાવન બની’તી;

તારી કીર્તિપતાકા ભૂમંડળને પ્રભાવિત કરતી બધે ફરી વળી’તી.

તારું જ્ઞાન, ગૌરવ, તારી ગરિમા, બધું જ અસાધારણ, અજોડ હતું.

અને આજે પણ ક્યાં નથી ?

પરંતુ તારા એ સર્વોત્તમ સિંહાસનને હલાવવા,

તને પીડા-પરિતાપના પારાવાર પ્રતિ બઢાવવા,

માનભંગ કરવા, તારી વિજયકૂચમાં વિઘ્નરૂપ થવા,

આજે કેટલાંક વિઘાતક વિદ્વેષભર્યા બળ કામ કરી રહ્યાં છે.

તારી વેદના-વહ્નિમાં એથી વધારે થયો છે.

છતાં પણ એ બળો સફળ નહિ થઈ શકે.

તું નહિ હારે; તારી આગેકૂચને એ નહિ મારે.

તું જાગ્રત છે અને આવી રીતે જ આથી પણ વધારે જાગ્રત રહેજે,

હે મારા દેશ ! મને વિશ્વાસ છે-તું નહિ હારે,

તારી વિકાસસાધના કીર્તિકૂચ મૂકીને નહિ હારે.

સંસ્કૃતિનાં સર્વોચ્ચ સુમેરુ શિખરો પર

સૈકાઓ પહેલાં આરૂઢ થયેલા મારા દેશ !

એકવાર ફરીથી ત્યાં આસીન થા.

પૃથ્વીને પ્રેરણા પા, મનુકુળનો માર્ગદર્શક થા !

(શ્રી યોગેશ્વરજી રચિત 'અક્ષત' માંથી )