અક્ષત

હનુમાનજીએ અયોધ્યાની રાજસભામાં, રામની સમક્ષ,

કહે છે કે, પોતાની છાતીને ખોલી બતાવી.

અને હૃદયમાં રહેલા રામની પ્રતિમાની સર્વે સભાજનોને પ્રતીતિ કરાવી.

ત્યારે જ શ્રીરામને, સીતાને, તથા બીજા બધાને ખાતરી થઈ કે,

હનુમાનજી પવિત્ર પ્રેમની પ્રતિમારૂપ છે.

એમના હૃદયના નાના કે મોટા કોઈયે ખૂણામાં,

શ્રીરામ વિના બીજું કાંઈ જ નથી.

મારા હૃદયને એવી રીતે ખોલી બતાવવાની જરૂર છે ?

તમારા વિના મારા હૃદયમાં બીજું કશું જ નથી રમી રહ્યું,

બીજા કોઈનું યે આસન નથી થયું.

એ વાતની પ્રતીતિ મારા દિલમાં ડોકિયું કરવાથી જ નહિ,

મારા રોમરોમનું દર્શન કરવાથી સહેલાઈથી થઈ રહેશે:

સ્વાભાવિક રીતે જ થઈ રહેશે.

(શ્રી યોગેશ્વરજી રચિત 'અક્ષત' માંથી )