અક્ષત

શરદઋતુના આજના આકાશને અવલોકીને

મને અપાર આનંદ થયો છે; ઘણું જાણવાનું મળ્યું છે.

મારી શંકા મટી ગઈ છે.

કેટલું બધું નિરભ્ર, સ્વચ્છ આકાશ છે ?

સુંદર તથા સુધામય પણ કેટલું ?

વર્ષાઋતુની પરિસમાપ્તિ પછીનું આવું આકાશ આજે જ જોવા મળ્યું છે.

મારા મનમાં અત્યાર લગી એમ હતું કે

જીવનમાં આટલી બધી અસાધારણ વિશુદ્ધિ

અથવા અમૃતમયતાનો આવિર્ભાવ નહિ થઈ શકતો હોય;

પરંતુ આજે મને પ્રતીતિ થઈ કે,

એવી શુદ્ધિ, સુંદરતા અને સુધામયતા શક્ય છે, એટલું જ નહિ, સત્ય છે.

એની પહેલાં વર્ષાનાં વાવાઝોડાં થાય,

વિઘ્નો કે વિષાદની વીજળી ચમકી જાય,

અશાંતિ અથવા તો અસ્વસ્થતાનાં અભ્ર પણ એકઠાં થાય,

પરંતુ આખરે તો એમનો અંત આવવાનો, એ બધાં વિખેરાઈ જવાનાં,

અને જીવન આવું જ-અરે આથી યે અધિક આકર્ષક,

અમીમય, અમલ બનીને પ્રકાશી રહેવાનું.

શરદઋતુના આજના આકાશને અવલોકીને

મારી એ શ્રદ્ધા જાગીને બળવત્તર બની ગઈ.

(શ્રી યોગેશ્વરજી રચિત 'અક્ષત' માંથી )