અક્ષત

સંસારની સુંદરતા, સુમધુરતા, તને મુગ્ધ ને મોહિત કરે છે ?

એ તને રસ ધરે છે, એના અનંત આકર્ષણમાં અટવાઈને તું કેદ બને છે ?

એને સંસારનું સર્વસ્વ ગણે છે ?

પરંતુ....મારે તને એ જ કહેવાનું છે કે,

કિરણમાં મોહિત થવાને બદલે એ કિરણ જેનું છે તેનો વિચાર કર.

કિરણ આટલું બધું સુંદર, સુમધુર, સ્વાદુ, આકર્ષક છે

તો જેણે એને પેદા કર્યું છે તેની સુંદરતા, સુમધુરતા, આકર્ષકતા કેટલી બધી હશે ?

પોતાના અખૂટ સૌન્દર્યભંડારમાંથી એકાદ ચપટી ભરીને એણે વેરી છે,

એના પરિણામરૂપે સૃષ્ટિમાં સૌન્દર્યમયી સુમધુર વસ્તુઓની ઉત્પત્તિ થઈ છે.

એ મૂલાધારનો વિચાર કર. એમાં કેદ બન.

મારા મન, એથી મુગ્ધ ને મોહિત થા.

હે હૃદય, એને અર્પણ થા. એને માટે જ આસન કર.

હે પ્રાણ, એને માટે પ્રેમમય બન, ફકીરી ધારણ કર. પાગલ બન.

તારી પીડા ટળી જશે, ચિંતા મટી જશે, તારી તૃપ્તિનો પાર નહિ રહે.

હે અંતરાત્મા, એ પરમ આત્મતત્વનો અનુભવ કર.

એના શતદલ કમળનો ભ્રમર બન.

(શ્રી યોગેશ્વરજી રચિત 'અક્ષત' માંથી )