અક્ષત

મા, માતૃભૂમિ અને મહીમંડળના મંગલમય રૂપમાં તમે જ છો:

તમારી જ એમાં અભિવ્યક્તિ છે :

એવી અપરોક્ષાનુભૂતિથી બધીયે ભ્રાંતિ ભાંગી ગઈ,

મારી બધીયે ભ્રાંતિ ભાંગી ગઈ.

પહેલાં હું મંદિરમાં પ્રવેશ કરતો, તીર્થોમાં ફરતો રહેતો :

તમારી ઝાંખીને માટે રડતો કે વ્યથિત બનતો :

પત્રે પત્રે, પુષ્પે પુષ્પે, ને વિટપે વિટપે ફરી વળતો :

પરંતુ એ ધન્ય દિવસે તમારી મંગલમૂર્તિ મને મળી ગઈ,

અને ખાતરી થઈ કે

મહીમંડળમાં જે મધુ છે તે તમારા જ મુખમાંથી ઢોળાયેલું છે,

જે સુખ છે તે તમારી જ પ્રતિછાયાના પરિણામરૂપ છે;

રસ, શાંતિ અથવા આનંદ છે તે તમારા જ અક્ષય અબ્ધિના આલાસરૂપ છે.

ત્યારથી મને નવી દૃષ્ટિ લાધી ગઈ, મારામાં નવી ચેતના જાગી ગઈ.

મા, માતૃભૂમિ અને મહીમંડળના મંગલમય રૂપમાં તમે જ છો:

તમારી એમાં અભિવ્યક્તિ છે:

એવી અપરોક્ષાનુભૂતિથી બધીયે ભ્રાંતિ ભાંગી ગઈ,

મારી બધીયે ભ્રાંતિ ભાંગી ગઈ.

(શ્રી યોગેશ્વરજી રચિત 'અક્ષત' માંથી )