અનંત સૂર

હું તને જ્ઞાની નહિ કહું. તારા મુખ પર વિષાદ છે; હું તને જ્ઞાની નહિ કહું.

ઊગતી ઉષાના આહલાદક લાવણ્યની જેમ તારું મન સ્મિતની રસરેખાથી શોભતું નથી; હું તને જ્ઞાની નહિ કહું.

સંસારમાં શોક છે, ને શોક કરીને તેમાં તું વધારો કરે છે; હું તને પંડિત નહિ કહું. આનંદનો અખંડ અનુભવ તારે મન એક અજાયબી છે.

વસ્તુવસ્તુમાં વહેતી આ ચૈતન્યની ધારા.....એમાં સ્નાન કરવાની તને સમજ નથી; એનું પાન કરીને તું પ્રસન્ન નથી; એના આચમનનો તારામાં આહલાદ નથી; હું તને તત્વજ્ઞાની નહિ કહું. એકતાના અનુભવની પ્રસન્નતા ને કૃતકૃત્યતા તારામાં દેખાતી નથી.

હું તને જ્ઞાની નહિ કહું. સ્નેહાળ શિશુની જેમ સરળ બનીને ક્ષણેક્ષણનો ઉલ્લાસ લેતો નથી; જીવનના ને જગતના આ મહોત્સવનો લહાવો લેતો નથી ને દેતો નથી.

હું તને જ્ઞાની નહિ કહું. તારા મુખ પર ભય છે, ભેદ છે, વિષાદ છે; હું તને જ્ઞાની નહિ કહું !

(શ્રી યોગેશ્વરજી રચિત 'અનંત સૂર' માંથી )