અનંત સૂર

કેટકેટલો વિચાર કરીને આવું છું, કે તારા નયન તરફ નયન માંડી એકીટસે નીરખી રહીશ; પરંતુ દ્રષ્ટિ મળતાં જ મારું સર્વસ્વ ખોઈ બેસું છું; મારું પ્રાણધન ઢોળી બેસું છું.

કેટકેટલો વિચાર કરીને આવું છું, કે તારા ચરણને ધરાઈ ધરાઈને ચૂમી લઈશ; પરંતુ તેની માદક સુવાસ સૂંઘતા જ મારુ ભાન ભૂલી રહું છું, હૃદય રેલી રહું છું.

કેટકેટલો વિચાર કરીને આવું છું, કે તારી સાથે આવી રીતે વાત કરીશ ને તને આવી રીતે આલિંગન આપીશ; પરંતુ તારું મૂક સંગીત શ્રવણ કરતાં જ હું તારામાં તન્મય થવા માંડુ છું, બધું ભૂલી જઉં છું.

કેટકેટલો વિચાર કરીને આવું છું, કે તારી સુંદરતાને આંખ ભરી ભરીને જોઈશ ને હૃદય ભરી ભરીને તારા પ્રેમનું પાન કરીશ; પણ તારી સુંદરતાનું પાન કરતાં જ હું સમાધિસ્થ થઉં છું ને એકાકાર બનું છું.

(શ્રી યોગેશ્વરજી રચિત 'અનંત સૂર' માંથી )