અનંત સૂર

એટલું તો સમજી લેજે ઓ ગાયક ! હૃદયની વીણાને મેં અનેક રાગરાગિણીથી ભરી છે; અનેક પ્રકારના સંગીતસ્વરથી સુશોભિત કરી છે; એના પ્રત્યેક તારમાં, સૂરમાં ને તાલમાં મારા પ્રાણની પળેપળની સાધના ભરી છે.

એકના એક આલાપને બંધ કર, ગાયક ! હમેશને માટે મારી દ્રષ્ટિ નૂતનની શોધમાં રહી છે; સુંદર ને અભિનવની મેં નિરંતર પૂજા કરી છે. રખે તું કહેતો કે એમાં કોઈ પૂર્વાલાપની છાયા રહી છે કે કો'ક ઋષિની પ્રતિભા ભરી છે ! સુંદર ને અભિનવની મેં હરહંમેશ પૂજા કરી છે.

ઋષિ તું ભલે કહે કે બ્રહ્મર્ષિયે ભલે ગણે; એથી પણ આગળની મારી સ્થિતિ રહી છે. તને કેમ કરીને કહું, ગાયક ! આ તો મારા હૃદયના એક સહસ્ત્રાંશની જ પ્રતિછબી છે ?

ને એથી જ હું વિચારમાં પડયો છું, ઓ મહાકવિ ! જે હૃદયમાં આ સુમધુર સૂરાવલિ ઊઠી છે, તે હૃદયની શી સ્થિતિ............?

તે ગીતનો વિષય નથી, પ્યારા ગાયક !  તેની ગીતિ જ નથી !

(શ્રી યોગેશ્વરજી રચિત 'અનંત સૂર' માંથી )