અનંત સૂર

બંસીધરની બંસીના મહાસૂરની સાથે મારા પ્રાણનો સંવાદ સધાયો છે ને તેનું સંગીત આપોઆપ વિરામ પામ્યું છે: આ જ મારા મૌનનું રહસ્ય છે.

સર્જનના કે સ્ત્રષ્ટાના કમલ પર બેઠેલો મારો પ્રાણભમરો તેના રસને ચૂસતાં પોતાને ને બીજાને ભૂલી ગયો છે: આ જ મારી નિશ્ચલ ને શાંત સ્થિતિનું રહસ્ય છે.

જગતના વિરાટ રસસાગરમાં મારો પ્રાણ બરફના ટુકડા જેવો તરે છે; ઘડીમાં સ્થિર થાય છે: આ જ મારી આત્મતૃપ્ત અવસ્થાનું રહસ્ય છે.

તું કદાચ મારા મુખ પરના આનંદ ને તેની દિવ્યતાને જોઈને વિચારમાં પડીશ. પણ તને ખબર નથી, હે પ્રિય સાધુ, કે આ અમૃતરસનું પાન કાંઈ જીભ કાપીને તાળવે લગાડવાથી નથી મળ્યું. પ્રિયતમના પ્રેમપ્યાલાને અહર્નિશ અધરે લગાડીને તેનું આકંઠે પાન  કરાયું છે: આજ મારી આનંદમય સ્થિતિનું રહસ્ય છે.

(શ્રી યોગેશ્વરજી રચિત 'અનંત સૂર' માંથી )