અનંત સૂર

તેઓએ કહેલું, તારી આંખ ચંદ્રમાને અમૃત આપનારી ને હૃદયને શાંતિ દેનારી છે; પરંતુ તેની સાથે આંખ મિલાવવાની ધૃષ્ટતા મેં કરી નથી, એ વિચાર પણ મને થયો નથી.

તેઓએ કહેલું, તારા અધર સ્વર્ગના સોપાનરૂપ ને અમૃતના આવાસ જેવા છે; પરંતુ તેની સાથે અધર મિલાવવાની ધૃષ્ટતા મેં કરી નથી, એ વિચાર પણ મને થયો નથી.

તેઓએ કહેલું, તારું હૃદય સંગીતની દેવીનું મંગલ મંદિર છે ને તેમાંથી જ આ સૃષ્ટિ પ્રકટી રહી છે;  પરંતુ તેની સાથે હૃદય મિલાવવાની ધૃષ્ટતા મેં કરી નથી, એ વિચાર પણ મને થયો નથી

તેઓએ કહેલું, તારી સોડ શ્રાન્ત અંતરને આરામ આપનારી ને દેહના પ્રદેશથી ઉપર ઉઠાવનારી છે;  પરંતુ તેના સહવાસની ધૃષ્ટતા મેં કરી નથી, એ વિચાર પણ મને થયો નથી

એ બધાને આશ્ચર્ય થયેલું. પણ મારી પૂજા જુદી હતી. તારી અંદર વિરાટ માનું દર્શન કરીને મારી આંખ તારાં અંગોથી પર થઈને મારી દેહલતા તારાં ચરણકમલમાં ઢળી પડી. શું એ ધન્યતા ને શાંતિ પહેલાં હતી ?

(શ્રી યોગેશ્વરજી રચિત 'અનંત સૂર' માંથી )