અનંત સૂર

તારું સુંદર રૂપ !

કરોડો સૂર્ય કે ચંદ્રમાનો પ્રકાશ જેના કિરણના એક સહસ્ત્રાંશ માત્રનું જ પરિણામ છે; ને જેની છાયાના એક લક્ષાંશને લીધે જ સૃષ્ટિમાં સૌન્દર્યનું ગૌરવ છે !

અહો તારાં ચરણકમલ !

જેની ગુલાબીની છાયામાત્ર આ ઉષાની શોભાનું ઉગમસ્થાન છે, ને જેની ચમકતી રેખામાં આ પરિમલધારી પુષ્પોની પ્રેરણા છે;

જેની લાલીની રજમાત્રથી જ સુંદરીઓ સુશોભિત બની છે, ને જેની મનોહરતાની છાયા જ સૌમાં આકર્ષણ બનીને વસી રહી છે;

આવી તું મને જોતાવેંત ભાન ભૂલી ગઈ, મારી પાછળ મુગ્ધ થઈને મને મુગ્ધ કરી ગઈ, ને મારે માટે પ્રેમની પ્યાલી બની ગઈ, એ આપણી કેવી અનેરી પ્રેમકથા છે !

(શ્રી યોગેશ્વરજી રચિત 'અનંત સૂર' માંથી )