Inspirational writings in Gujarati - અનંત સૂર

અંતરના અંતરતમમાં પ્રસ્ફુટિત મંજુલ રવ

અનંત સૂર

આત્માને અલંકૃત કરનારી પ્રેરણાદાયી રચનાઓ

સાધનાની સમાપ્તિ



< BACK	અનંત સૂર	NEXT >

આજ સુધી હું તને સમજી શક્યો ન હતો, ને એટલે જ તારે માટે યોગ્યતા મેળવવા મહેલ મૂકીને વનની વિજન વાટે ચાલી નીકળેલો.

આજ સુધી હું તને સમજી શક્યો ન હતો, ને એટલે જ તારા પ્રેમનું પાત્ર બનવા ને તારી કૃપાથી કૃતાર્થ થવા ગહન ગિરિપ્રદેશની ગુફામાં છુપાઈ રહેલો.

આજ સુધી હું તારો પવિત્ર પ્રેમ જાણી શક્યો નહતો, તારું રહસ્ય સમજી શક્યો ન હતો, ને એટલે જ યોગ ને જ્ઞાન તથા ઉપાસના ને ભક્તિ-તપની અટપટી ગલીઓમાં ગૂંચવાઈ ગયેલો.

પણ આજ તને જાણી શક્યો, ને ત્યારે જ સમજ્યો કે તારે માટેના મર્મભેદક મૂક પોકારમાં જ સર્વ કાંઈ સમાઈ જાય છે, સર્વે સાધન સમાપ્ત થાય છે.

-------

(શ્રી યોગેશ્વરજી રચિત 'અનંત સૂર' માંથી )