પરિમલ

તને મળવા ના આવે તો પણ શું ?

તારે નિરાશ થવાનું કારણ નથી.

સમય આવશે ને એ જ તને મળવા માટે મનોરથ કરશે, તલપાપડ બનશે.

*

તારી સામે ના જુએ તો પણ શું ?

તારે ઓછું લાવવાનું કોઈ કારણ નથી.

સમય આવતાં એ જ તારા દર્શન માટે ને તને આંખ ભરીભરીને જોવા માટે તત્પર થશે; એમાં પોતાનું સૌભાગ્ય સમજશે.

*

એ તારી નિંદા કરે ને તિરસ્કારે તો પણ શું ?

સમય આવશે ને એ જ તારી સ્તુતિ કરશે, ને તને સન્માવવા આગળ આવશે; એને પોતાના જીવનનો આનંદ માનશે.

*

એ તારી વાત ના સાંભળે, ને તારી સામે ધૂળ ઉડાડે, તો પણ શું ?

સમય આવતાં એ તારા પથપ્રદર્શન માટે પડાપડી કરશે; તારા ચરણને પાવન ગણશે.

અને એમાંનું કશુંયે ના થાય તો પણ શું ?

(શ્રી યોગેશ્વરજી રચિત 'પરિમલ' માંથી )