Parimal - Inspirational writings in Gujarati

પ્રભાતના પુષ્પોની મનભાવન મહેંક એટલે જ

પરિમલ

આત્માને અલંકૃત કરનારી પ્રેરણાદાયી રચનાઓ

દરિયા જેવું દિલ



< BACK	પરિમલ	NEXT >

નાનું દિલ, પણ છે દરિયા જેવું. એનામાં ઊંડાણ ઘણું છે, અને છે પણ અત્યંત વિશાળ.

ભાવની ભરતી એની અંદર આવ્યા કરે છે, અહોનિશ આવ્યા કરે છે; ને શાંત છતાં સુમધુર, સનાતન, સુખદાયક સંગીતસ્વરમાં, પોતાના પ્રાણને એ ઠાલવ્યા કરે છે.

ઉપર ઉપરથી નજર નાખનારને એમાં સલિલ સિવાય બીજું કાંઈ જ નહિ દેખાય. પણ એની અંદર ન જાણે કેટકેટલાં મોતી ભર્યાં છે; પ્રેરણાના અમર અમૃતદાને એણે ન જાણે કેટલાને જીવન ધર્યાં છે !

નાનું દિલ, પણ છે દરિયા જેવું : અસીમ, અમાપ, અગાધ, દૈવી દરિયા જેવું.

-------

(શ્રી યોગેશ્વરજી રચિત 'પરિમલ' માંથી )