પરિમલ

કયી ધન્ય ઘડીએ, કયી પાવન પળે, મારા દિલને તમે તૈયાર કર્યું છે, તેની મને ખબર નથી. કયી ધન્ય ઘડીએ ને કયી પુણ્યવાન પળે !

જગતમાં જેનો જોટો ના જડે એવું અનેરું ને અનુપમ છે એ દિલ. એનો અનુરાગ અને એની આકાંક્ષા, એની નિર્મળતા ને એની નિષ્ઠા, બધું જ અજોડ છે. અને એ બધા કરતાં પણ એની અંદર અંકિત થયેલી તમારી મંગલમય, મનહર, મન્મથને મહાત કરનારી તમારી મૂર્તિ ! એથી એની આભા અનેકગણી વધી ગઈ છે.

બીજાં દિલ અનેક હશે, ને છે. પરંતુ આની અસાધારણતા એમાં છે કે એ પોતાનું મટી ગયું છે, તથા તમારું થયું છે. તમારી જ સંપત્તિ, તમારું જ મહિમામંડિત, મધુમય મંદિર, ને તમારું જ આશ્રયસ્થાન બન્યું છે.

કયી ધન્ય ઘડીએ, કયી પળે, મારા દિલને તમે તૈયાર કર્યું છે, તેની મને ખબર નથી. કયી ધન્ય ઘડીએ ને કયી પુણ્યવાન પળે !

(શ્રી યોગેશ્વરજી રચિત 'પરિમલ' માંથી )