પરિમલ

અમૃતના અપાર એવા અર્ણવમાં અમૃત વિના બીજું શું હોય, માનવ ? છતાં તું વિષ-વરાળની વેદના બોલી બતાવે છે, ને વિષનું વમન કરે છે, એ આશ્ચર્યકારક છે !

*

સુધાના સનાતન, સીમાહીન સાગરમાં સુધા સિવાય બીજું શું હોય, માનવ ? છતાં તું સોમલના સ્વાદનો સંતાપ બોલી બતાવે છે, ને સોમલથી છલેલા શબ્દોચ્ચાર કરે છે, એ આશ્ચર્યકારક છે !

*

આ તો પરિમલથી પરિપ્લાવિત પ્રફુલ્લ પુષ્પોનું ઉપવન છે. એમાં પરિમલની પ્રતીક્ષા કરવાની ને પરિમલને માટે પીડિત થવાનું ના હોય, માનવ ! છતાં એમાં શ્વાસ લઇને તું પરિમલ માટે પ્રાર્થે છે ને પોકાર પાડે છે, એ આશ્ચર્યકારક છે !

*

વસંતના વિલાસમાં પાનખરનો પ્રવેશ નથી, ને બીજી ઋતુનું પણ નામનિશાન નથી. એના સામ્રાજ્યમાં તો સઘળે સુખ જ સુખ, સર્વત્ર શાંતિ જ શાંતિ, ને આજુબાજુ આનંદ જ આનંદ છે, માનવ ! છતાં એનો પ્રજાજન બનીને તું શાંતિ, સુખ અને આનંદ માટે તલસે છે, એ આશ્ચર્યકારક છે !

*

તારી દૃષ્ટિ ને વૃત્તિને ફેરવી દે; તો આજે જે અભિશાપરૂપ લાગે છે, તે જ કાલે આશીર્વાદરૂપ થઈ પડશે, માનવંતા માનવ ! આજે જે મૃત્યુમય તે જ કાલે નવજીવન થઈ પડશે.

(શ્રી યોગેશ્વરજી રચિત 'પરિમલ' માંથી )