Text Size

સ્નેહની સતતતા

પદ્મની પાંખડી પેઠે પ્રસન્નપણે પ્રકટતા પ્રભાતના પ્રથમ પ્રહરમાં જો;
મારી આંખમાં તારા અનુરાગનું અમૃત ના દેખાય,
તો તું ભલે ના આવીશ !

બળુંબળું થતા ને બીજાને બાળતા બિહામણા બપોરે જો;
મારા અંગેઅંગમાં તારી આરાધનાનો આભાસ ના દેખાય,
તો તું ભલે દર્શન ના દઈશ !

સ્વર્ગમાં જવા સારુ સાજ સજીને તૈયાર થયેલી સોહામણી સંધ્યાએ જો;
મારા જરી જેટલા ઝરણ જેવા વહી રહેલા જીવનમાં
તારી ઝંખના ના જણાય,
તો તું ભલે ના આવીશ!

રોમેરોમમાં રાગરાગિણી ભરીને ઊભેલી રસરાજ્ઞી રસીલી રાતે જો;
મારી આંખમાં તારાં આંસુ ને તારે માટેની આતુરતા ના દેખાય,
તો તું ભલે દર્શન ના દઈશ !

મંગળમય મહાકાવ્યના જેવી મધુરી મધરાતે જો;
મારી પુલકિત પાંપણ પર તારું પીયૂષ ના પરખાય,
તો તું ભલે ના આવીશ !

કોઈ પણ કાળે ને સ્થાને જો;
મારા હૃદય ને રોમેરોમમાં તારો રણકાર ના સંભળાય,
રાસ ના નીરખાય,
તો તું ભલે ના આવીશ !

- શ્રી યોગેશ્વરજી

Add comment

Security code
Refresh

Today's Quote

There is nothing that wastes the body like worry, and one who has any faith in God should be ashamed to worry about anything whatsoever.
- Mahatma Gandhi

prabhu-handwriting