બાળક બોલો આજ, કે કરશો કેવાં કાજ ?
કોની વૃદ્ધિ ? ....કે મળે શાંતિનું રાજ ?
નિર્ભયતા ને દયા વધારો, સ્નેહભાવને તેમ;
નમ્ર બનીને જીવો જગમાં, સરળ નદીની જેમ ... બાળક બોલો આજ,
વૃદ્ધિ સેવાની કરો, સંપ વધારો જ્ઞાન;
સંયમ ને સ્વાધ્યાય વધારો, ઉત્તમ કરતા પ્રાણ .... બાળક બોલો આજ,
ક્ષમાભાવ ધીરજને ધારો, કરો હિંમતવિકાસ;
પવિત્રતા, માધુર્ય વધારો, એમાં સુખનો વાસ .... બાળક બોલો આજ,
નિષ્પાપ અને નિષ્કપટ બનો, સૌનું ચાહો ક્ષેમ;
યત્ન કરો બીજાના હિતના,સધાય છે હિત એમ ... બાળક બોલો આજ,
શ્રદ્ધા શિસ્ત ઉદારતા તથા શુભ આચારવિચાર;
શૌર્ય તેમ સાહસની વૃત્તિ, ઉત્તમતાનો સાર.... બાળક બોલો આજ,
- શ્રી યોગેશ્વરજી