તમે મારી સાથે કાયમને માટે રહેવા આવશો
ત્યારે મારી દશા કેવી અનેરી થઈ જશે તેની કલ્પના કરી શકો છો ?
આજે તમે તમારા અલૌકિક સ્વરૂપમાં મારી પાસે પ્રકટ થઈને
મને તમારા પ્રેમનું પીયૂષ પાયા કરો છો ત્યારે મારી આ દશા થાય છે,
તો તમે સદાને માટે મારી સાથે રહેવા આવશો
ત્યારે મારી દશા કેવી દૈવી થઈ જશે તેની કલ્પના કરી શકો છો ?
તમારી આંખોમાંથી મારી આંખોને હું પાછી હઠાવીશ નહિ,
ને છાતી પરથી છાતીને અલગ નહિ કરું.
તમારા હાથને હાથમાં લઈ તમારી રસસુધાનું પાન કરતાં હું બેસી રહીશ -
દિવસો, મહિના ને વરસો સુધી બેસી રહીશ ને તમારી મરજી મુજબ વિચરણ કરતો રહીશ.
ખાવું, પીવું ને સુવું મારે માટે મુશ્કેલ થઈ પડશે;
ને તમારા વિના મારું બધુંયે જગત અદૃશ્ય બનશે.
આજે તમારા પ્રેમમાં હું આટલો બધો મગ્ન છું,
તમારી પાછળ હું આટલો બધો પાગલ છું.
તો તમે મારી પાસે તમારા પરિપૂર્ણ રહસ્યને ખોલી દેશો
ને મારી સાથે સદાને માટે રહેવા માટે પ્રકટ થશો,
ત્યારે મારી દશા કેવી અનેરી થઈ જશે તેની કલ્પના કરી શકો છો ?
હા, તે વખતે પણ પૃથ્વીને મારામાંથી પ્રકાશ મળતો જ રહેશે.
માનવજાતિને જ નહિ પણ સમસ્ત મનુકુળને મારી મદદ મળતી રહેશે.
તેની મને ખબર છે કેમ કે મારું ને તમારું જીવન જ તે માટે છે :
બીજાના મંગલ માટે.
- શ્રી યોગેશ્વરજી