તમારી આ કેવી અનુપમ કૃપા માત જગની!
તમોને ના જાણે જગત ન સ્તવે પૂજન કરે
નહીં, ના આરાધે તદપિ વહવી પ્રેમરસને
જગે જન્મો જીવો સફળ કરતાં કર્મ નિયમો,
પ્રસૂનો પીડાથી વ્યથિત જનના મારગમહીં
પ્રસારો, એ કેવી અનહદ કૃપા દિવ્ય કરુણા!
જગે જીવી ચીંધો પરમસુખ સાફલ્યપથને
મટાડો પીડાને પુનિત સઘળું મંગલ કરો;
તમોને સંતાપે અબુધજન નીંદે પણ તમે
પુરસ્કારો પ્રેમે વિપદ હરતાં જીવન ધરો.
સુખે સંકેલી લો મનુજતનલીલા પણ મરો
નહીં કો'દિ; કેવી અનુપમ કૃપા દિવ્ય કરુણા !
- શ્રી યોગેશ્વરજી