અમે પ્રેમ મહીં ચકચૂર, અમે હરિ મહીં મશગુલ !
અમે તોડ્યા સઘળાં બંધન, માન્યું બીજું સઘળું ધૂળ;
અંતરમાં એકલ હરિ અમારે, વસ્યું હરિનું રૂપ. ... અમે.
છે હરિ મુખમાં, મનમાં હરિનું ધ્યાન હંમેશ અમૂલ;
આંખે અંજાયો પ્રેમ હરિનો, બીજી ના કૈં સૂધ ! ... અમે.
અમે વારેવારે જન્મ લઇએ વહાવવા રસપૂર,
જે પ્યાસી તેને અમૃત ધરવા, પ્રેમીને વૈકુંઠ. ... અમે.
જે ભૂલ્યાં તેની ઉકેલનારા અમે હમેશાં ગૂંચ;
જે અંધારે અટવાતાં પામે પ્રકાશના તે પુંજ. ... અમે.
અંધારા પ્રેમ થકી જીવનમાં લાગે છે કૈં નૂર,
બે હાથ જોડતાં એ જ કામના, પ્રેમ જ દો હરિ, ખૂબ! ... અમે.
- શ્રી યોગેશ્વરજી