MP3 Audio
*
એવી કરી ક્ષણવાર દયા,
મને દિવ્ય દર્શન દઇ દો તમે.
મારા મનમાં મૂર્તિ તમારી રમે,
મારું મનડું બીજે ક્યાંય ન ભમે;
એને મિલન તમારું ફક્ત ગમે,
મને દિવ્ય દર્શન દઇ દો તમે ... એવી કરી
કૈં દિનથી રાહ રહ્યો જોઇ,
પ્રેમાશ્રુથી દિલને ધોઇ;
મારો દાહ ન દિલનો લેશ શમે,
મને દિવ્ય દર્શન દઇ દો તમે ... એવી કરી
દર્શન વિણ સાચે ચેન નહીં,
આનંદ ખરેખર લેશ નહીં,
દુનિયા ન લેશ તમારા વિના ગમે,
મને દિવ્ય દર્શન દઇ દો તમે ... એવી કરી
દર્શન દો, આલિંગન આપો,
અનુરાગ થકી અંગે સ્થાપો;
તો અમૃત રોમરોમ જેમ,
મને દિવ્ય દર્શન દઇ દો તમે ... એવી કરી
આ સઘળો પળનો ખેલ ખરે,
તોય તરસે મારો પ્રાણ મરે;
હવે વિરહ નહીં વધુવાર ખમે,
મને દિવ્ય દર્શન દઇ દો તમે ... એવી કરી
- શ્રી યોગેશ્વરજી