તારી કૃપાનું એક જ બિંદુ પડ્યું
ને મારી જન્મોજન્મની તૃષા ટળી ગઈ.
તારા પ્રકાશનું એક જ રશ્મિ છૂટ્યું
ને મારી યુગયુગની અંધારપૂંજી જલી ગઈ.
તારા સૌન્દર્યની એક જ છાયા પડી
ને મારી કુરૂપતા ઊડી ગઈ.
તારા રૂપની એક જ રજ પડી
ને મારી વિરૂપતા મટી ગઈ.
તારી દૃષ્ટિની એક જ રેખા પડી
ને મારી વિહવળતા જતી રહી.
તારી અમીદૃષ્ટિનું એક જ બિન્દુ પડ્યું
ને મારી જુગજૂની તૃષા ટળી ગઈ.
આજે મેં એ ભેદ જાણ્યો
કે તારી કૃપાના ક્ષીરસાગરમાં
સાધનાની સર્વે સરિતા સરી જાય છે,
તારી કરુણાના મહાજલમાં
ભજનજલના બધા જ ભંડાર ભળી જાય છે.
- શ્રી યોગેશ્વરજી