જીવન છેક જ દુઃખભર્યું !
અશાંતિનું ઘર, કટુતાથી ભર, કાયમ ક્લેશભર્યું ! ... જીવન.
ક્યાંક વેદના, તાપ તપે છે, બીજે પર્વ થયું;
હર્ષશોક ને વિરહમિલનને ઝૂલે ઝૂલી રહ્યું ! ... જીવન.
છતાં માનવી મદમાં ડૂબે, સહન કરે સઘળું;
શરણ તમારું ના સ્વીકારે શાશ્વત શાંતિભર્યું ! ... જીવન.
ચારુ તમારા ચરણોમાં છે જેણે સ્વર્ગ ગણ્યું;
કૃપા તમારી પ્રાપ્ત કરી છે તેનું ભાગ્ય ફર્યું ... જીવન.
રંક રાય છે થયા, પતિતને પાવન ધામ મળ્યું;
સર્વ પ્રકારે સુખ પામ્યા તે, દળદર દૈન્ય ટળ્યું ! ... જીવન.
પ્રેમ તમારો જીવનરણમાં અમૃતપાત્ર ભર્યું;
ચાખી લીધું જેણે તેનું કારજ સકળ સર્યું ! ... જીવન.
‘પાગલ’ કહે અચંબો ભારી, તમને સહુ વિસર્યું;
જગત બનત નહિ તો સુખમય આ, સાચેસાચ કહ્યું ! .. જીવન.
- © શ્રી યોગેશ્વરજી