મેં કાનુડા તેરી ગોવાલણ
MP3 Audio
મૈં કાનુડા તેરી ગોવાલણ‚
મોરલીએ લલચાણી રે .. મૈં કાનુડા.
હરખેં ઈંઢોણી માથે લીધી‚
ભરવા હાલી હું તો પાણી રે‚
ગાગર ભરોંસે ગોળી લીધી‚
આરાની હું અજાણી રે… મૈં કાનુડા.
ગાય ભરોંસે ગોધાને બાંધ્યો‚
દોહ્યાંની હું અજાણી રે‚
વાછરું ભરોંસે છોકરાં બાંધ્યા‚
બાંધ્યા છે બહુ તાણી રે… મૈં કાનુડા.
રવાઈ ભરોંસે ઘોસરું લીધું‚
વલોવ્યાની હું અજાણી રે‚
નેતરાં ભરોંસે સાડી લીધી‚
દૂધમાં રેડયાં પાણી રે…મૈં કાનુડા.
ઘેલી ઘેલી મને સૌ કોઈ કહે છે‚
ઘેલી હું રંગમાં રે’લી રે,
ભલે મળ્યા મહેતા નરસિંહના સ્વામી‚
પૂરણ પ્રીત હું પામી રે ..મૈં કાનુડા.
- નરસિંહ મહેતા
Comments