હે સંત, મારા જીવનના આધાર છો.
તમે તો મારા પ્રેમી પ્રાણાધાર છો.
હે સંત, મારા જીવનના આધાર છો.
તમારી કૃપાથી મારું જીવન આનંદે ચાલે,
તમારી આશિષે એનાં ફૂલડાં ઊગે ને ફાલે;
દૈવી કો દાતાર છો. ....હે સંત મારા.
જીવનના રણમાં ન્યારી વનસ્થલી છે તમારી;
તાપે તપેલું હૈયું છાયા પામે છે ભારી;
અમૃતના આગાર છો. ....હે સંત મારા.
તમે છો પિતા ને માતા સખા તેમ સ્નેહી,
પ્રાણ તેમ જીવન ને દેહ વળી દેહી;
સંસારના એક સાર છો. ....હે સંત મારા.
કૃપાની અખંડ વર્ષા વરસી રહેજો પ્રેમે;
અમારા વિના રહેજો વિખૂટા કદી ના કેમે;
પ્રેમીના હૈયાના હાર છો. ....હે સંત મારા.
- શ્રી યોગેશ્વરજી