સંતપુરૂષ હે અખિલ જગતના,
પ્રણમું વારંવાર, પ્રેમે પ્રણમું વારંવાર !
તમારા વિના કોને પ્રણમું,
ભજું રટું ને સ્તવું તેમ હું ;
જીવનના આધાર, પ્રેમે પ્રણમું વારંવાર ! ...સંતપુરૂષ હે.
સાથ તમારો પામું ત્યારે
ઉભરાયે ઉર રસની ધારે ;
લાગે અન્ય અસાર,પ્રેમે પ્રણમું વારંવાર ! ...સંતપુરૂષ હે.
આંખમહીંથી અમૃત ઢાળો,
સુખનો પાર રહે ના મારો ;
થઉં કલેશની પાર, પ્રેમે પ્રણમું વારંવાર ! ...સંતપુરૂષ હે.
વચન તમારાં સુણવાં મારે;
રમું નિરંતર એ જ વિચારે;
પ્રાર્થું વારંવાર, પ્રેમે પ્રણમું વારંવાર ! ...સંતપુરૂષ હે.
ચરણમહીં જીવનનું ઝરણું,
વહી રહે મારીને મરણું,
'પાગલ' પ્રાણાધાર! પ્રેમે પ્રણમું વારંવાર ! ...સંતપુરૂષ હે.
- શ્રી યોગેશ્વરજી