તમારું શરણું જે લે છે તેને ચિંતા ક્યાં રે' છે ?
સંકટ ભલે હજારો આવે,
તાપ ભલેને લાખ તપાવે;
છોને કોટિ ક્લેશ સતાવે;
ડર ક્યાં કોઇનો રે' ... તમારું શરણું
નાખો આંસુ ભક્તનાં ધોઇ;
ઘા રાખો કાયમ ના કોઇ;
ઝંખે પ્રેમે તમને કોઇ,
તેને પીડા ક્યાં રે' છે ? ... તમારું શરણું
મહિમા મોટો ખ્યાત તમારો,
શરણાગત સંભાળો તારો;
જે જન જન્મી થાય તમારો,
તેને બંધન ક્યાં રે' છે? ... તમારું શરણું
'પાગલ' ગુણને ગાય તમારા,
પ્રભુ, સર્વસ્વ તમે છો મારા;
સાર્થક કરશો શબ્દો તમારા,
શ્રદ્ધા એ જ સદા રે' છે ... તમારું શરણું
- શ્રી યોગેશ્વરજી
Comments