હે દેવ પરમ હિતકારી,
મારું હિત ગયા શું વિસારી !
હશે કરોડો ભક્ત તમારા, ગણના છો ના મારી;
મારે તો પ્રભુ એક તમો છો, અતૂટ એવી યારી.
તનમન તેમજ અંતર દીધું ચારું ચરણમાં ઢાળી....હે દેવ.
તનથી પૂજું, મનથી પૂજું, પૂજું હૈયે ધારી;
વાણીથી ભક્તિરસ ચાખું રૂપ તમારું ભાળી.
રોમરોમમાં રાગ ભરીને રાસ રમું છું ભારી. ...હે દેવ.
'પાગલ’ પ્રેમીના ના છોડો, નમ્ર પ્રાર્થના મારી;
હિતનું કામ કરી દો આજે ચિંતા શમાવો સારી.
વાર વિપળની હવે કરો ના, કૃપા કરી દો ન્યારી....હે દેવ.
- શ્રી યોગેશ્વરજી