માતા થઇ શિશુતણી જગમાં અનેક
સંતાન માત ગણતાં નિજ જેમને ને
સંભાળતાં સુખ પ્રદાન કરી રહેતાં
સાભાર સાદર ભજી અતિપૂજ્યભાવે
સન્માનતાં નિત કરી રસસાથ સેવા.
માતા થઇ, હજુ થતી જગમાં અનેક
જે મૃત્યુ બાદ પણ યાદ કરાય નિત્ય
શ્રદ્ધા થકી જગવતાં અણમોલ પ્રીત.
વ્યક્તિત્વ અદભૂત તમારું ખરે નિરાળું,
માતૃત્વ સુંદર ઉદાત્ત અતીવ ન્યારું.
માતા બન્યાં ઉભયને અમ જન્મ આપી
માતા થઇ પણ ગયા મમતાળુ સૌનાં
કાલાંતરે ગુણ થકી, સહુ માત નામે
બોલાવતા અનુભવી કૃતકૃત્યતાને
માતા બની શિશુતણી જગમાં અનેક,
માતા થઇ જગતની પણ કો'ક એક.
- શ્રી યોગેશ્વરજી