સુહાયે માનું મુખ કેવું !
મધુથી મઢેલું જ્યોતિ,
જીવનધન જેવું;
ફોરમના તો ઊડે ફુવારા,
ઉપવન છે એવું ! ....સુહાયે
શાંતિસદન શું વિમલ વદનનું,
સુખ ટપકે કેવું !
સ્વપ્ને પણ દેખી લે તેને,
ગમશે દિલ દેવું ....સુહાયે
તપ્ત જનોની વનસ્થલી શું,
અમૃત ફળ જેવું;
ભૂખ્યાંનું ભોજન છે ભારે,
અક્ષય નિધિ એવું ....સુહાયે
એના રસમાં રુચે જેમને,
રમવું ને વહેવું,
રહે તેમને કૈં ચિંતા કે,
સંકટ ના સહેવું ....સુહાયે
સત્યાસત્ય કહેજો જેને,
જે હો તે કહેવું,
મને તો ગમે એ માનસરે,
હંસ બની રહેવું ....સુહાયે
- શ્રી યોગેશ્વરજી