પ્રેમ નથી દિલમાં,
પ્રભુજી કેમ મળે પળમાં ?
લેશ રડે ના અંતર તારું
વિરહ તણા દવમાં;
ભૂલેચૂકે પણ ના ભાંગે
ભ્રાંતિ ખરે ભવમાં.
આકુળવ્યાકુળ થાય હૃદય ના
મિલનતણી સ્મૃતિમાં ... પ્રભુજી કેમ મળે
આંખમહીં અનુરાગ ન આંજ્યો,
વ્હાલ ન વચનોમાં;
ધમનીમાં ધડકાર ન થાયે,
સતત નથી સપનાં.
સુમનસમું સોળેય કલાએ
ખીલ્યું અંતર ના ... પ્રભુજી કેમ મળે
શરીરથી સેવા કર તેમ જ
ભાવો ભર મનમાં;
અંતરમાં અનુરાગ જગાવી
'પાગલ' બન ક્ષણમાં.
જગજીવન તો જરૂર જડશે
મળશે કણકણમાં ... પ્રભુજી કેમ મળે
- શ્રી યોગેશ્વરજી