અંતરનો અનુરાગ

અમાસની રાતે આસોની

અમાસની રાતે આસોની, પ્રકાશની પૂનમ પ્રકટો !
દીપાવલી કરી દો ન્યારી, પ્રકાશની પૂનમ પ્રકટો !

આજ તમારી કરું પ્રતીક્ષા લગન લઈને લોચનમાં,
મંદિરના દીપકના જેવી આશ જલાવીને ઉરમાં;
અમૃતના આગાર થકીયે મધુર તમે આજે પ્રકટો,
અમાસની અંધારી રાતે પ્રકાશની પૂનમ પ્રકટો !

તપી રહ્યો કૃશકાય તપસ્વી બાલ તમારો કૈં દિનથી,
ગુર્જરદેશે કાયા ધારી વસે હિમાલયમાં મનથી;
ભૂમિ અલૌકિક ઉત્તમ છે આ જનની સંસ્કૃતિ સંતોની,
પ્રકટ બનો તો આજ પ્રેમથી, આશા અન્ય નથી કોની.
સાકાર સુધાસ્વરૂપ જેવાં રસમય આજ તમે પ્રકટો,
અમાસની અંધારી રાતે પ્રકાશની પૂનમ પ્રકટો !

પ્રેમીજનને પ્રેમામૃતથી તૃપ્ત કરી દો આજ તમે,
મુક્ત કરી સંપૂર્ણ કરી દો, અન્ય ન મુજને કૈંય ગમે.
આશા ઉરની, માધુરી મનની, પ્રતિમા પ્રેમતણી પ્રકટો,
ગૌરવની ગંગા, સાધનની સિદ્ધિ, યશગાથા, પ્રકટો !
અમાસની રાતે આસોની પ્રકાશની પૂનમ પ્રકટો !

પ્રકાશપંથ બતાવું સૌને, મનુકુલને ચિરશાંતિ ધરું,
સ્વયં બની સંપૂર્ણ અન્યને પૂર્ણ થવાની વાત કરું;
યશ ફેલાવું બધે તમારો, સ્વપ્ન લઈને એ ફરતો;
તમારી જ છે બધી પ્રેરણા, તમે જ મારાં પ્રેરક તો.

પૂર્ણતાતણું પ્રભાત બનતાં ‘પાગલ’ની પાસે પ્રકટો,
અમાસની અંધારી રાતે પ્રકાશની પૂનમ પ્રકટો !
દીપાવલી કરી દો ન્યારી, પ્રકાશની પૂનમ પ્રકટો !

- © શ્રી યોગેશ્વરજી

Add comment

Security code
Refresh

Today's Quote

God writes the gospel not in the Bible alone, but on trees and flowers, and clouds, and stars.
- Luther

prabhu-handwriting

We use cookies

We use cookies on our website. Some of them are essential for the operation of the site, while others help us to improve this site and the user experience (tracking cookies). You can decide for yourself whether you want to allow cookies or not. Please note that if you reject them, you may not be able to use all the functionalities of the site.