કલ્યાણની ખરેખર વર્ષા હવે કરી દો !
ધરતી ઘણી તપી છે, વિહ્વલ બની રહી છે;
રસના નિધાન, તેને રસથી હવે ભરી દો ! ... કલ્યાણની.
ખેડૂત ખેતરે આ ઝંખે સદા તમોને,
આશાભરી; નિરાશા તેની હવે હરી લો ! ... કલ્યાણની.
પંખી જુઓ પુકારે, પશુ કેમ પ્રાણ ધારે;
વૃક્ષો ચહે છે જીવન, જીવન ખરે ધરી દો ! ... કલ્યાણની.
સૂકાય કંઠ મારો, સંતપ્ત પ્રાણ સારો;
હે પ્રાણ, તો પધારો, ઉકળાટ આ હરી લો ! ... કલ્યાણની.
આજે ખરે પધારો, ઉદ્ધાર થાય મારો;
પરિપૂર્ણતા ધરીને નૂતન મને કરી દો ! ... કલ્યાણની.
કલ્યાણ થાય કૈંનું, કલ્યાણ જો કરી દો;
પાવન પ્રકાશ પામે, દર્શન પ્રથમ દઈ દો ! ... કલ્યાણની.
- © શ્રી યોગેશ્વરજી