છેક સાધારણ કહી છે વાત મેં તમને,
દિવ્ય દર્શન દો તમારું, થાય શાંતિ મને;
વિરહની હોળી સળગતી અંતરે મારા,
શમાવો તેને વરસતાં પ્રેમની ધારા !
દિવાળી પ્રકટે પછી જીવનમહીં મારે,
ધન્યતાસંગીત પ્રકટે હૃદયને તારે;
પાનખરનો અંત આવે, હસે તેમ વસંત,
માગણી છે એ જ મારી, ક્લેશનો હો અંત !
હજી સાંભળતાં નથી પણ તમે મારી વાત,
સંભળાવું ખંતપૂર્વક રોજ દિન ને રાત;
થાય છે આશ્ચર્ય મુજને, ગયો ખૂટી પ્રેમ,
રંક માટે હૃદયમાંથી તમે મૂકી રે’મ ?
ભક્તને તો તારશે કો’, કોણ કરશે પાર ?
શાંતિ દેશે કોણ, કરશે કોણ રસની ધાર ?
તમારા વિણ જિંદગીમાં શો રહેશે સાર ?
તમારા વિણ કોણ કરશે વિરહથી ઉદ્ધાર ?
કહે ‘પાગલ’ એટલે સમજી હજી જાઓ,
વખત વીતે તે પહેલાં પ્રેમથી આવો;
વાત સાધારણ છતાંયે તુચ્છકારો ના,
અલ્પ મારો પ્રેમ, છે પણ પ્રબળ ખૂબ જ હા !
- © શ્રી યોગેશ્વરજી