તમે મને જીવનદાન કર્યું.
તમે મને અમૃતપાન ધર્યું.
જીવનના વનમાં ફરવાનું ખૂબ હતું કપરું,
સાથ તમે આપીને તેમાં કષ્ટ હર્યું સઘળું. ... તમે મને.
ભવોભવતણું દળદર મારું તેમજ તિમિર ટળ્યું;
શીતળ સોડ તમારી પામી કિસ્મત છેક ફર્યું. ... તમે મને.
કહી શકાયે કેમ કરીને કેવું જાદુ કર્યું,
ચેતન તમે તમારું મારે રોમરોમ ભર્યું. ... તમે મને.
ધન્ય હતો એ દિન કે જ્યારે હૈયે હૈયું મળ્યું;
લેશ પ્રેમને જોતાં જ તમે નિજ સર્વસ્વ ધર્યું. ... તમે મને.
બદલો વાળું કેમ કરીને, ઋણ વળી વિસરું ?
‘પાગલ’ વર્યો તમોને તેમજ જન્મોજન્મ વરું. ... તમે મને.
(૨૩-૨-૧૯૫૮, રવિવાર)
– © શ્રી યોગેશ્વરજી