સાધક, કરજે મનનો રંગ.
બહારના રંગે ના રમજે
કરજે અંતર રંગ ... સાધક કરજે
કૂડકપટનો ત્યાગ કરીને
તજજે કામ કુસંગ;
હંસ સમાન બનીને નિશદિન
કરજે સજ્જનસંગ ... સાધક કરજે
જેની આગળ અલ્પ જણાયે
છેક અનંત અનંગ,
તેની જ કરી લેજે કેવલ
આરાધના અભંગ ... સાધક કરજે
ભગીરથ બની ઉતારજે હું
ઉરમાં રસની સંગ;
ધીરજ ને ઉત્સાહ મરે ના,
તપનો થાય ન ભંગ ... સાધક કરજે
'પાગલ' જેમ જ રમજે કેવલ
પ્રભુને દિવ્ય ઉછંગ;
અશાંત શાંત કરી દેજે સૌ
ચરણે વૃતિવિહંગ ... સાધક કરજે
- શ્રી યોગેશ્વરજી