હવે હું તો એવો યોગ કરું.
પ્રેમપ્રદીપ જીવની જ્વાળા, તપનું તેલ ભરું;
આતુરતા અંગારે એમાં પૂર્ણ પ્રકાશ કરું .. હવે હું તો
કંઠી કરુણા, ભસ્મ ભાવની, મનની માળ ધરું;
સુરતાને સાંધીને ચરણે આવી રોજ મળું .. હવે હું તો
શીલતણા સાધનથી સહેજે આ સંસાર તરું;
નામનાવમાં નેહ કરીને દિન ને રાત ફરું .. હવે હું તો
રાગ હૃદયથી કરું તમોને, દિલનું દાન કરું;
તન-મન-અંતરની આરતિ ને પ્રેમપ્રસાદ ધરું .. હવે હું તો
'પાગલ' પરમપંથ છે ત્યારે ભટકી કેમ મરું;
સમતાની સિદ્ધિ પામીને કાય કૃતાર્થ કરું .. હવે હું તો
- શ્રી યોગેશ્વરજી