સુણી લો અરજી મારી આજ.
કરુણા કરી પધારો જલદી, કરવા મારું કાજ....સુણી લો.
હજી સાંભળ્યો કેમ તમે ના, આતુર છેક અવાજ;
આજ સુધી સચવાઈ કેમે, જો જો જાય ના લાજ....સુણી લો.
ક્ષુધિતને તમે શાંતિ આપતા, ઉત્તમ મિષ્ટ અનાજ;
શાંતિ માટે તેમજ પ્રકટો સજતાં સુંદર સાજ....સુણી લો.
વિલંબ કેમ કરો છો, મેં કૈં નથી માગિયું રાજ;
નવી નથી આ વાત તમારે, કર્યાં કૈંકનાં કાજ....સુણી લો.
કહે તમોને દીનબંધુ ને, ભક્ત ગરીબનિવાજ;
'પાગલ’ બાળકને અપનાવો, સૃષ્ટિના શિરતાજ ! ....સુણી લો.
- શ્રી યોગેશ્વરજી