Text Size

સંસારના જનકપાલક છો તમે

સંસારના જનકપાલક છો તમે,
વ્યાપ્યા ચરાચરમહીં પ્રભુ સર્વના છો;
ઈપ્સિત ભક્તજનને સ્મિતસાથ આપો,
સાઈપ્રભો, સકળ સત્વર કષ્ટ કાપો !

દૈવી અનંત અવિનાશી વળી અજન્મા
વેદે સ્તવ્યા અતિપુરાણ કહી નિયંતા;
ઈપ્સિત ભક્તજનને સ્મિતસાથ આપો,
સાઈપ્રભો, સકળ સત્વર કષ્ટ કાપો !

ગાઈ શકે ન મહિમા કદિ કો તમારો,
માપે વિશાળ નભ મચ્છર શું બિચારો;
તોયે કરેલ સ્તુતિના પર લક્ષ આપો,
સાઈપ્રભો, સકળ સત્વર કષ્ટ કાપો !

છો પ્રેમમૂર્તિ, વરસો નિજ પ્રેમપાણી,
ને છો દયાળુ મમતાવળુ અખંડ દાની;
દૈવી કૃપાતણું ખરેખર દાન આપો,
સાઈપ્રભો, સકળ સત્વર કષ્ટ કાપો !

આધાર એક જગમાં પ્રભુ છે તમારો;
બીજો ગણ્યો સ્વપ્નમાં પણ ના સહારો;
ના યોગ્યતાપ્રતિ જુઓ બસ ભાવ માપો,
સાઈપ્રભો, સકળ સત્વર કષ્ટ કાપો !

હો સ્વલ્પ ઋણ પણ તેય અદા કરે છે,
લેનાર પૂર્ણ ઉપકાર ગણી ભરે છે,
ગીતોનું ઋણ પણ વ્યાજ સમેત આપો,
સાંઈપ્રભો, સકળ સત્વર કષ્ટ કાપો !

 - શ્રી યોગેશ્વરજી

Add comment

Security code
Refresh

Today's Quote

We judge ourselves by what we feel capable of doing, while others judge us by what we already have done.
- Longfellow

prabhu-handwriting

Cookies make it easier for us to provide you with our services. With the usage of our services you permit us to use cookies.
Ok