નમસ્કાર મારા, હજારો નમસ્કાર મારા !
જેના દિલમાં પવિત્રતા ને પ્રેમતણી ધારા,
સદ્ ગુણથી શોભિત સંસ્કારી ભાવભર્યા ન્યારા;
પ્રણામ એવા સંતચરણમાં રાતદિવસ મારા !
નમસ્કાર મારા, હજારો નમસ્કાર મારા !
અમૃત આંજેલી આંખલડી તેમજ મધુરી વાણ,
મોટા નાના ઉચ્ચનીચની જેને ન પડે જાણ;
વિનમ્ર વિનયી તેમ થયા જે ધૈર્યક્ષમાવાળા,
પ્રણામ એવા સંતચરણમાં રાતદિવસ મારા !
નમસ્કાર મારા, હજારો નમસ્કાર મારા !
પરહિત માટે જીવન જેનું જેની છે કાયા,
પ્રભુના વિના ન કોઇ સાથે કરનારા માયા;
ચઢાવતા જે પ્રતિપળ પ્રભુને ભાવતણી માળા,
પ્રણામ એવા સંતચરણમાં રાતદિવસ મારા !
નમસ્કાર મારા, હજારો નમસ્કાર મારા !
પ્રભુમય એ સંત કરો નિશદિન મંગલની ધારા,
પ્રેમફુવારા ઉડો તેમના રોમરોમ મારા;
પોતાનાશો મને બનાવો તે પ્રભુના પ્યારા,
પ્રણામ એવા સંતચરણમાં રાતદિવસ મારા !
નમસ્કાર મારા, હજારો નમસ્કાર મારા !
- શ્રી યોગેશ્વરજી