તૃષા લાગે તમારી તો

તૃષા લાગે તમારી તો દર્શન ખરે દો છો.
ક્ષુધા જાગે તમારે કાજ તો દર્શન ખરે દો છો.

કરે તલસાટ જો કોઇ, હૃદય રોજે રહે રોઇ;
કરે પોકાર પ્રેમે તો તમે દર્શન ખરે દો છો... તૃષા લાગે.

કરે આનંદ આર્ત બની, ચઢાવે ભેટ ભાવ તણી
હૃદય અર્પે તમોને તો તમે દર્શન ખરે દો છો... તૃષા લાગે.

જપે તમને નિરંતર જે, રટે તેમ જ સ્તવે તમને,
તમારા ધ્યાનમાં ડૂબે, તમે દર્શન ખરે દો છો... તૃષા લાગે.

તમારામાં ગણે સુખ જે, વળી સંપત્તિ સમજે છે;
તમારામાં કરે આનંદ તો દર્શન ખરે દો છો... તૃષા લાગે.

બની ‘પાગલ’ તમારા પ્રેમજલમાં ન્હાય નિશદિન જે,
રહો તેના થકી ના દૂર, અપનાવી તમે લો છો... તૃષા લાગે.

- શ્રી યોગેશ્વરજી